JAMBI NEGERI SELOKO

Susilo Bambang Yudhoyono
sri paduko maharajo notonegoro

Negeri jambi..negeri melayu yang lah tenamo dari zaman dahulu kalo, di pimpin oleh rajo nan alim bijaksano. mulai dari ujung jabung sampai durian di takuk rajo, dari sialang balantak besi hinggo bukit tambun tulang. tuan benamo datuk paduko berhalo dengan ratu putri selaras pinang masak. dengan putro rangkayo hitam nan gagah perkaso..di lingkung adat dengan agamo. yang sudah tersebut di dalam seloko melayu jambi

Lautnyo sakti rantaunyo batuah
aek nyo jenih ikannyo jinak
rumputnyo panjang kerbaunyo gemuk

bungin di pulau menjadi emas
batu di gunung menajdi intan
lalang di tanam bebuah padi
cekur di lambuk kuning isi nyo
kayu di rimbo babungo perak
tanaman di humo babungo suaso

bumi senang padi menjadi
negeri aman kampungnyo rami
ke ayek cemetik keno
ke darat durian runtuh
dilaman terenak beembang biak
naik umah anak pun lahir
masuk dapur lemang tebujur

apo di pintak apo dapat
mano di kendak segalo ado
selagi basebut selagi banamo
sekali pinto sekali belaku
balak jauh penyakit lepeh

segalo itu di dapat dan di rasokan kareno segalo masyarakat hidup besamo saling tolong menolong, sesuai dengan kato seloko

tudung menudung bak daun sirih
taup bataup bak unak ketam
jait ba jait bak daun petai

betemu empang unak samp di teteh
betemu empang batang samo di kabung
betemu empang batu samo di kalik

naik samo ke ateh puncak nan satu
turus samo kebawah luhak nan dalam

bulan baik saling menjelang
berelek samo bagendang
malang samo baibo
muju samo balabo

dak ado kusut nan idak di selesai
dak ado keruh nan idak di jernihkan
agamo di kerjo
adat di pegang
tuah di jago




ANDRA GB fm

Ingin lebih lengkapnya di https://www.facebook.com/andra.juliandra?fref=ts

Posting Komentar

Lebih baru Lebih lama